♥😂 का मय सुनावव संगी... 😂♥
♥😂 का मय सुनावव संगी... 😂♥ ********************************* एती तेती सबो कोती,जनता बेहाल जी, का मय सुनावव संगी, देश के हाल जी... महिना महिना चँऊर, बढ़िया मिलत हे, हेयर डाई लगाय हावै, कोढ़िया घूमत हे, दिनो-दिन होवत हे, किसान कंगाल जी... का मय सुनावव संगी... जेला हमन चुनें रेहेन, बनगे नवाब, दारू भट्ठी खोले हावै, बेचत हे शराब, दारू पी के टूरा मन, करत हे धमाल जी... का मय सुनावव संगी... आनी-बानी के देश म, योजना चलत हे, शौचालय के गिनती म, गुरुजी लगत हे, साग-भात चुरिस नहीं, गलिस नहीं दाल जी... का मय सुनावव संगी.... दाई-ददा के पइसा म, टूरा मारत हे फुटानी, सिनेमा देखे रायपुर जाबो, चल मोर जानी, टूरा-टूरी के फेर म, गाँव-गाँव मे बवाल जी... का मय सुनावव संगी.... मोर बिना का होही, सूते-सूते सोंचत हौं.. का होही देश के, मनेमन म गुणत हौं... करना धरना कुछु नहीं, फालतू सवाल जी.. का मय सुनावव संगी.... ✍केतन साहू "खेतिहर"✍ बागबाहरा, महासमुंद (छ.ग.) मो. नं.- 7049646478 My blog: ketansahu77.blogspot.com **********************************