🤣नखरा तोर झर जाही रे...🤣
💫💫💫💫💫💫💫💫💫💫💫💫
झनकर तैं झगरा बाबू..खाना ल झन फेंक,
नखरा तोर झर जाही रे, रांध-कूट के देख...
💫💫💫💫💫💫💫💫💫💫💫💫
बने-बने तैं रांधस नहीं, काहत मुड़ी पीरागे,
अब्बड़ मारे ताना तैं तो, बाई घलो रिसागे,
चूल्हा कस गुंगवावत हे..फूँक मार के देख...
नखरा तोर झर जाही रे...
💫💫💫💫💫💫💫💫💫💫💫💫
आगी-पानी जुगार कर, छेना लकड़ी लान,
बटकी म..पिसान ले-ले, नून डार के सान,
रोटी तोर जर जाही रे..उलट-पुलट के सेंक,
नखरा तोर झर जाही रे...
💫💫💫💫💫💫💫💫💫💫💫💫
नून-मिरचा,धनिया ले-ले, सिलपट्टा तैं पीस,
खा ले संगी अलवा-जलवा, झन कर तैं रीस,
मोर कहना..मान ले बाबू अब तो घुटना टेक...
नखरा तोर झर जाही रे...
💫💫💫💫💫💫💫💫💫💫💫💫
✍केतन साहू "खेतिहर"✍
बागबाहरा, महासमुंद,(छ.ग.)
Copy right @ketan.
Comments
Post a Comment